പൊളിറ്റിക്സ്

പൊളിറ്റിക്സ്
....................

തിരക്കുപിടിച്ച തെരുവ്
പലതരം മനുഷ്യർ,
അവിടെയായിരുന്നു ആ
ഭക്ഷണശാലകൾ.
ഓരോന്നിന്റേയും ചുമരുകൾക്ക്
ഓരോരോ നിറങ്ങളായിരുന്നു .
ചുമപ്പ്, പച്ച, കാവി, വെള്ള, നീല
അങ്ങനെ ഓരോ വർണ്ണങ്ങൾ,
ബോർഡുകളിൽ അവകാശവാദങ്ങളും
അവരവരുടെ പ്രത്യേകതകളും
താരതമ്യങ്ങളും എഴുതി തൂക്കിയിരുന്നു.
ഭക്ഷണശാലകൾ തമ്മിൽ
രൂക്ഷമായ കിടമത്സരമാണ്
നിലനിന്നിരുന്നത്.
വിഭവങ്ങളിലും വിലകളിലുമുള്ള
വ്യത്യസ്തതകൾ,
കറികളിലും രുചികളിലുമുള്ള
വൈവിധ്യങ്ങൾ,
അകകാഴ്ച്ചകളിലും ആതിഥ്യമര്യാദ -
കളിലുമുള്ള വൈരുദ്ധ്യങ്ങൾ,
(ചില കടകൾ ചില മതക്കാർക്കു
മാത്രമുള്ള ഭക്ഷണങ്ങളെ
ഉണ്ടാക്കുമായിരുന്നുള്ളൂ)
തമ്മിൽ തമ്മിൽ സദാ
ആരോപണപ്രത്യാരോപണങ്ങൾ!
ഭക്ഷണശാലകളിൽ പോകുന്നവർ
തമ്മിലും ചേരിതിരുവുകളുണ്ടായിരുന്നു.
മൂത്രപ്പുര തിരഞ്ഞുപോയ
നിരക്ഷരനും ഊമയുമായ
മനുഷ്യനാണ്,വഴി തെറ്റി
അവിടെയെത്തിയത്,
എല്ലാത്തിന്റേയും പൊതുവായ
അടുക്കളയിലേക്ക്!

അതിന്റെ ഒറ്റ പിൻവാതിലിലേക്ക്!
DR:ANUP'S POETRY