കാലൻ

കാലൻ
...................

കൈകൾ കൊരുത്തു പിടിച്ചോളൂ
വിരലുകൾ കെട്ടിപ്പിടിക്കട്ടെ,
മനുവും ശതരൂപയുമാണ് നമ്മൾ
വിശപ്പിൽ നിന്നും പിറവികൊണ്ടോർ!
കാലം നമുക്ക് ശേഷമുള്ളതാണ്
കഥകൾ വരാനിരിക്കുന്നതേയുള്ളൂ,
വിയർപ്പിലെ ജലാംശം മാത്രമേ
നനവായിട്ടുള്ളൂ, മിഴിനീരിനിയും
പോളകൾക്കുള്ളിൽ ഉറഞ്ഞുകൂടിയിട്ടില്ല.
ആദിമ പ്രപഞ്ച വഴികളിൽ
നമുക്കിണചേരാൻ മരത്തണലുകളില്ല
നക്ഷത്ര നിഴലുകളേയുള്ളൂ.
ശതരൂപയിൽ നിന്ന് സഹസ്രകോടി
രൂപങ്ങൾ രൂപാന്തരങ്ങൾ!
ഒടുവിൽ പൂർണ്ണവിരാമം പോൽ
അവൻ ജനിക്കുമ്പോൾ, പിന്നെ
മരണങ്ങൾ മാത്രമേയുള്ളൂ,
അവൻ നിശ്ചയിക്കുന്ന മരണങ്ങൾ .
സഹസ്രകോടികൾക്കും ആരാച്ചാർ,
മൃത്യുവിന്റെ മൊത്തവ്യാപാരി.
അവന്റെ കാതിൽ നമുക്ക്

'മനുഷ്യാ'യെന്നു മൂന്നുരു പേർ ചൊല്ലാം!
DR:ANUP'S POETRY