ദക്ഷിണ

ദക്ഷിണ
* * * * * * *
എടുത്തുകൊൾക, ഇലക്കീറിൽ
പൊതിഞ്ഞുവെച്ചിരിക്കുന്ന,ഞങ്ങടെ
കറുത്ത തള്ളവിരലുകൾ,
അരിഞ്ഞുവീഴ്ത്തിയ അമ്മവിരലുകൾ,
അറിവുവിരലുകൾ!
ഒരു കാറ്റിനൊലിയായി പോലും
ഒരു പകൽസ്വപ്നമായി പോലും
കാതിലോ കരളിലോ ഒരറിവുപോലും
പകർന്നു തരാത്തവർ ,
കലണ്ടർചിത്രങ്ങൾ പോലെ
ചുവരുകളിൽ മാത്രം ഗുരുവായി,
തറഞ്ഞിരിക്കുവോരെങ്കിലും,
ദക്ഷിണ ഞങ്ങൾ നൽകണം,
പ്രദക്ഷിണം ഞങ്ങൾ വെയ്ക്കണം!

എടുത്തുകൊൾക,
എടുക്കുവാനല്ലേ നിങ്ങൾക്കറിയൂ,
കൊടുക്കുവാനേ ഞങ്ങൾക്കും .
ആരണ്യകങ്ങളിലടിയാളകുടികളിൽ
ചീഞ്ഞളിഞ്ഞ ചേരികളിൽ
ഞങ്ങളെന്നുമുണ്ടാവും (ഉണ്ടാവണമല്ലോ)
നിങ്ങൾക്കു നിലനിൽപ്പിനുള്ള ദക്ഷിണകളുമായി .

ഇനി തിരിച്ചുപൊയ്ക്കൊള്ളുക,
കള്ളചൂതിന്റെ,പെൺപീഢനപർവങ്ങളുടെ,
അധികാര വടംവലികളുടെ,
സാമ്രാജ്യത്വ സൗധങ്ങളിലേക്ക്.
വിജയമുദ്രകൾ ഉയരട്ടെ
നിങ്ങളുടെ വെള്ളതള്ളവിരലുകളിൽ,
കരയില്ല ഞങ്ങൾ,ശാപവചസ്സുതിർക്കില്ല ഞങ്ങൾ

ദക്ഷിണ കിട്ടിയതല്ലോ നിങ്ങൾ തൻ ജന്മങ്ങൾ !
DR:ANUP'S POETRY