ചൂടാറിയ ചായ

ചൂടാറിയ ചായ
* * * * * * * * * * *
ചായക്കോപ്പയിലെ ചൂടാറിയ 
ചായയൊരു ' സമസ്യയാണ് '.
നൂറു ചോദ്യങ്ങളിലേക്കെളുപ്പം
വഴുതി വീണേക്കാവുന്നയൊന്ന്,
നാക്കുപിഴച്ചാൽ അഴിപോലും
എണ്ണേണ്ടിവരുന്ന പ്രഹേളിക.
സംഭവം ചായക്കടക്കാരന്റെ കുഴപ്പംകൊണ്ടാകുമോ?(കയ്പ്പുമാത്രം രുചിച്ചിട്ടുള്ളവൻ
മധുരം ചേർക്കാൻ മറന്നിട്ടുണ്ടാകാം)
ചായയുടെ സ്വന്തം തെറ്റായിരിക്കുമോ?
(പീരയും വെള്ളവുമായി ചായ
സ്വയം പിരിഞ്ഞുപോയിട്ടുണ്ടാവാം)
അതോ,ചായകുടിക്കാരനായിരിക്കുമോ
കുറ്റക്കാരൻ?( പക്ഷാഘാതം പോലെ
കൈപോലും ഉയർത്താൻ കഴിയാത്ത
പരിതസ്ഥിതികളിലേക്കയാൾ
എത്തിപ്പെട്ടിരിക്കാം).
ചതുരപെട്ടികളിലെ അന്തിചർച്ചകളിൽ ,
ചൂടാറിയ ചായ തിളച്ചുമറിഞ്ഞു.
ചായയുടെ ചരിത്രം
ചായവിറ്റവന്റെ പഴയ ചിത്രം
ചായകുടിക്കുന്നവരുടെ ചാരിത്രൃം
ചായക്കോപ്പയിലെ കൊടുംക്കാറ്റ്
ചായ നിർമ്മിതിയിലെ അപഭ്രംശങ്ങൾ
വട്ടമിട്ടുപറന്ന ഈച്ചയുടെ തിരോധാനം
മറ്റ് പ്രതിലോമ/പ്രതിപക്ഷ ഇടപെടലുകൾ !
ചേർച്ചയില്ലാത്ത ചർവിതചർവ്വണം!
കോപ്പയിലെ ചൂടാറിയചായ ഒരാഗോള പ്രതിസന്ധിയാണ്!
DR:ANUP'S POETRY