സാന്ത്വനം

സാന്ത്വനം
* * * * * * * *
നിഴലില്ലാത്തൊരു ദിനം
ദിഗന്തങ്ങൾ പൊട്ടിത്തെറിക്കും,
മോഹഭംഗങ്ങളുടെ തമോഗ്രഹങ്ങ -
ളാകാശം നിറയ്ക്കും,
ദുർനിമിത്തങ്ങൾ എഴുത്തുമേശമേൽ നിരക്കും,
കാൽച്ചോട്ടിലെ ഭൂമിയൊരഗ്നി-
പർവതമായി പുകയും,
നിർത്താതെ കൊടുംകാറ്റടിക്കും
കരിമേഘക്കെട്ടുകൾ പൊടുന്നനെ
അഴിഞ്ഞലറി നിപതിക്കും,
വൻമരങ്ങൾ കടപുഴകും
നിർത്താതെ കൂമൻ ചിലയ്ക്കും,
കുറുനരികളോരിയിടും,
ഓർമ്മകളോടിയകലും .

ആർദ്രമാം നിൻ കരാംഗുലി -
കളാന്നേരമെൻ കരമൊന്നു
തലോടുകിൽ, ഘനമൗനമാർ-
ന്നൊരു വാക്കുമൂളുകിൽ,
പ്രശാന്തമാകുമീ ഭൂമിയും വ്യോമവും
പ്രക്ഷുബ്ധമെൻ മനസ്സുമതിൻ

മായക്കാഴ്ച്ചകളും മതിവിഭ്രമങ്ങളും!
DR:ANUP'S POETRY