ദൃശ്യം

ദൃശ്യം
*******

സിനിമാ കാണുംപോലെ
നമുക്കീ കവിതയിലൂടെ പോകാം .
സീനുകളിൽ നിന്ന് സീനുകളിലേക്ക്.
സീൻ : ഒന്ന്
വിജനമായ വീട്
വഴിതെറ്റിയൊരു യുവാവ്
കോലായിലാളനക്കങ്ങളില്ല.
വിറയാർന്നകൈകൾ നേരെ
കോളിംഗ്ബല്ലിലേക്ക് ....
കാറ്റുപിടിച്ച കവുങ്ങുകൾ
ഇരുൾമൂടുന്നൊരാകാശം.
പുലർച്ചെയെന്നും,പത്രതാളുകളിൽ
കണ്ടും വായിച്ചും,
മനസ്സിൽ പറ്റിപ്പിടിച്ച കാഴ്ച്ചകൾ.
അടുത്തടുത്തേക്ക് വരുന്ന
കൊലുസ്സിന്റെ ശബ്ദം.
ഉള്ളിലാകെയൊരങ്കലാപ്പ്.
വേലിപൊളിച്ചോടുന്ന ക്ടാവ്.
ഫ്ലാഷ്ന്യൂസുകൾ സ്ക്രോളുകൾ
ആഴത്തി പതിഞ്ഞ
ചിത്രങ്ങൾ കേൾവികൾ
ചിറകടിക്കുന്ന മോഹങ്ങൾ.
കതകു തുറന്നതും
പിന്നെ നടന്നതും
തനിയാവർത്തനങ്ങൾ,
പുതിയ എക്സ്ക്ലൂസീവുകൾ.
സീൻ: രണ്ട്, മൂന്ന് നാല് ............
വായിച്ചു തീർന്ന പത്രങ്ങൾ
കക്ഷത്തിൽ തിരുകി
നടന്നുതുടങ്ങുന്ന പുതിയയാത്രികർ !
നിയമപരമായ മുന്നറിയിപ്പ്
'വാർത്തകളുടെ പകർപ്പല്ലോ ജീവിതം'#

# ഈ വരിക്ക് സന്തോഷ് കുമാറിന്റെ

സിനിമാ പറുദീസയോട് കടപ്പാട്.
DR:ANUP'S POETRY