ഏകലോകം

ഏകലോകം
---------

'വീടുമുറ്റത്ത് അമേരിക്കയെന്ന്'
വിജയൻമാഷ്* നേരത്തേ പറഞ്ഞിട്ടുണ്ട്!
ഇതിപ്പം, വീടകം നിറയേ
ചൈനയങ്ങനെ വ്യാപിച്ചുകിടക്കുന്നു!
പോക്കറ്റിൽ ഗൾഫ്
ഉടുപ്പിൽ സൂര്യനസ്തമിക്കാത്ത സാമ്രാജ്യം'
കാർഷെഡ്ഢിൽ ഉദയസൂര്യന്റെ നാട്,
തൊഴുത്തിൽ സ്വിസ്
കഴുത്തിൽ ബൽജിയം.
വീടകംപുറം നിറയേ ഓരോരോ
സാമ്രാജ്യങ്ങൾ, അവയുടെ അടയാളങ്ങൾ.
ചായ്പ്പിൽ കൂട്ടിയിട്ടിരിക്കുന്ന
ചവറുകൾക്കിടയിൽ
കമ്മാളച്ചനും കുംഭാരത്തിയും
ചക്രംതിരിച്ചുണ്ടാക്കിയൊരു
മൺകുടം വക്ക്പൊട്ടി കിടപ്പുണ്ട്
ഒരു രാജ്യത്തിന്റേം പേരെഴുതാതെ !

തലയ്ക്കുള്ളിൽ സാമ്രാജ്യങ്ങളുടെ
കടലിരമ്പലുകൾ ,കുളമ്പടിയൊച്ചകൾ .
വഴിതെറ്റി വന്നവരും,
വഴിതെറ്റിക്കാൻ വന്നവരും ,
വഴിപറഞ്ഞുതന്നവരും
കപ്പലേറി വന്നവരും
കപ്പംപിരിക്കാൻ വന്നവരും .
പുതിയ ലോക ദർശനങ്ങളുടെ
അധിനിവേശ അപ്പോസ്തലന്മാർ!
മണ്ണുംചാരിനിന്നവരൊക്കെ
കൃഷ്ണമണിപോലും കട്ടോണ്ടുപോയി.

ഭൂപടങ്ങൾ വീടിന്റെ
വിസ്തീർണ്ണത്തിലേക്ക്
മാറ്റിവരയ്ക്കുമ്പോൾ,
ഏകലോകത്തിൽ ,തന്റെ
ലോകം നഷ്ടപ്പെട്ടവന്
ആത്മനിന്ദയുടെ അരിശം
അണിവിരലിൽ നിന്നും
ഉച്ചിവരെ അരിച്ചുകയറും .
അടുക്കളപുറത്ത് കുഴിച്ചിട്ടിരിക്കുന്ന
കുന്നിക്കുരുവിൽ നിന്നും
ഒലിവിലകൾ തളിർക്കുമോ?
കരം രസീതിയിലെ തണ്ടപേര്
ചൈനീസിലാവുമോ?

* പ്രൊഫ:എം.എൻ.വിജയൻ
DR:ANUP'S POETRY