പേരില്ലാത്തവന്റെ പാട്ട്

പേരില്ലാത്തവന്റെ പാട്ട്
..............................

നിന്നെ ഉയിരോളം പ്രണയിക്കുന്ന
എന്റെ ശരീരത്തിലെ
ഓരോ കോശവും ,
കാത്തിരിക്കയാണ്..
കാതോർത്തിരിക്കയാണ്..
നീയെന്നെ വിളിക്കുന്ന
പേരിനായി ..
പേരിന്റെ വേരില്ലാത്തൊ-
രെനിക്കു നീയേകുന്ന
പേരിനായി ......

നിന്റെ സ്വനതന്തുക്കളിൽ
നിന്നു വൈഖരിയായി
ആ നാമമുയരുമ്പോൾ,
ഞാൻ വാസ്തവമാകുന്നു,
സനാഥനാകുന്നു....
വിളിക്കപെടാതെ,
വിസ്മൃതിയുടെ ഭാണ്ഡത്തിലേക്ക് അത്
വഴുതി വീഴുന്നെങ്കിൽ,
പ്രിയേ, എന്റെ പേരെഴുതിയ
കടലാസു കഷണം നീ
നുള്ളി നുള്ളി കീറുക...
ഇനിയാർക്കുമൊരിക്കലും
വായിക്കാനാവാത്ത വിധം
തുണ്ടം തുണ്ടമായി മുറിച്ച്
ഒരു ചെറുമൺകുട -
ത്തിലടച്ച് നിന്റെ
മാനസഗംഗയിലൊഴുക്കുക....
അനാമികനായി എന്റെ
സഹജശുദ്ധസത്വത്തിലേക്കു
ഞാൻ തിരികെ പോകട്ടെ!

DR:ANUP'S POETRY